आफ्नै घाईते सहचालकलाई कालीगण्डकीमा फाल्ने चालक स्याङ्जा प्रहरीको नियन्त्रणमा

घाईते सहचालकलाई कालीगण्डकी नदीमा फाल्ने चालकलाई स्याङ्जा प्रहरीले पक्राउ गरेको छ । जिल्ला प्रहरी कार्यालय स्याङ्जाका प्रमुख प्रहरी उपरीक्षक होबिन्द्र बोगटीका अनुसार ट्याक्टर चालक अमित परियार पक्राउ परेका हुन् ।

श्रीमती र छोरी सहित भारत तर्फ भाग्न लागेको अवस्थामा प्रहरीले रुपन्देहीको बेलहिया नाकाबाट पक्राउ गरेको जिल्ला प्रहरी कार्यालयका प्रमुख प्रहरी उपरीक्षक बोगटीले जानकारी दिए । वडा प्रहरी कार्यालय वालिङबाट खटिएका प्रहरी निरीक्षक हरिप्रसाद पौडेलको टोलीले रूपन्देही वेलहिया नाकाबाट चैत १३ गते पक्राउ गरीएको प्रहरीले जनाएको छ ।

चैत्र ५ गते अस्थायी नं लु.अ.अ.फ. १०१२ भएको स्थायी नम्बर प्राप्त नभएको ट्याक्टर चालक गल्याङ ८ बंग्रान्तीका २७ वर्षीय चालक अमित परियार, सहचालक २१ वर्षीय सुनिल राना र १९ वर्षीय गणेश गाहाले साँखरबाट बालुवा लिएर राति फर्कने क्रममा गाहा ट्याक्टरबाट खसेका थिए । चालकको दायाँ–बायाँ बसेका मध्ये बायाँपट्टी बसेका सह–चालक गाहा ट्याक्टरबाट खसि घइते भएकोमा चालक परियार र सहचालक रानाले सोही ट्याक्टरमा राखी कालिगण्डकी साँखरघाटमा लगी नदीमा बगाएको प्रहरीले जनाएको छ ।

यसअघि गत चैत्र ८ गते अर्को सहचालक सुनिल राना पक्राउ परेका थिए । प्रहरीले घटनास्थलबाट मृतकको १ जोर चप्पल र रगत लागेको ढुंगा बरामद गरेको थियो । अदालतबाट म्याद थप गरी अनुसन्धान भैरहेको प्रहरीले जानकारी दिएको छ ।